沙律難忘猴擒男友拖去停車場
少女情懷總是詩，擁有大批男Fans的網絡女神張沛樂（沙律），初中時亦有不少青澀浪漫經歷，曾因唔夠零用錢搭車，半夜在男友陪伴下步行個多小時返屋企！這次沙律帶大家重遊兒時居住的鴨脷洲及返學的香港仔區，行經鴨脷洲大橋重拾浪漫回憶，又重返童年時視為避難所的遊樂場，及分享被猴擒男同學拉到停車場的牙煙往事！
運動健將重臨母校
沙律小時候性格內向，至初中後被老師點名做班長才「性情大變」，變得主動、活潑及健談，她重返位於華富邨的母校培英中學時感觸良多：「我做咗女班長後，使命感同正義感大咗，開始被大家注意，多嘢講咗，做咗兩年班長，同同學打成一片。」
作為運動女神的她原來自小已紮紮跳冇時停，初中時參加各類校隊，將運動潛能大爆發：「記得開學上咗兩堂體育堂，個好惡嘅Miss叫我留低，原來係讚我游得好，叫我參加泳隊，之後我再參加田徑隊、羽毛球隊，基本上每日都留低做運動。」
鴨脷洲大橋 摸黑漫步夠浪漫
鴨脷洲大橋連接香港仔與鴨脷洲，沙律初中時試過孖男友摸黑行個多小時回家：「媽咪冇帶我行過呢條橋，但我認得條路，放學用晒零用錢就自己行返屋企，有次同當時男友半夜去數碼港睇戲，散場已經冇尾班車，又冇錢搭的士，於是我哋經過華富邨、行到香港仔再行大橋返去海怡半島，當時覺得浪漫o架，細細個冇咩錢，認為有人陪比起使錢更窩心、浪漫。（平時夜晚行會唔會危險？）我都幾大膽，夜晚行係畀男人撩過，但我板起塊面，佢哋都怕咗我。」
海怡半島遊樂場 走堂避難所
沙律小時候最愛到遊樂場玩，但有次玩鞦韆時竟幻想自己是空中飛人，最終受傷收場：「記得四歲嗰陣，見到其他小朋友企喺度玩鞦韆，我又想試吓，仲幻想自己飛到好高時放手，係咪可以好似空中飛人咁，結果當然跌親撼親頭，有位媽咪安慰我，問我幾歲，我就答『四對』，所以好記得四歲已經喺度住。」她又視遊樂場為避難所：「媽咪逼我參加好多課外活動，有啲我唔想去，就嚟呢度搵個窿匿埋，可以Hea五、六個鐘。」
驚心動魄停車場
沙律初中時開始拍拖，但亦試過不快經歷，行過學校附近的停車場，不禁想起驚心畫面：「有個同班男同學追我，我網上應承咗同佢拍拖，但現實世界我好怕醜，佢撩親我講嘢，我都行開，後嚟覺得一直拒絕佢唔好意思，終於有次我應承赴約，放學就手拖手走，點知佢帶咗我去停車場，仲好猴擒，之後我驚咗佢，做番朋友，所以奉勸各位後生仔真係唔好咁猴擒！」
少女心事 巴士站密斟
培英中學附近的巴士站，是沙律每日放學必經之地！她表示多數會與同學由華富邨坐車到香港仔玩一會兒才返屋企，等車期間都會密斟少女心事，不過有時亦會選擇漫步一小時回家：「每日零用錢得幾蚊，有時用咗嚟買薯餅或雞翼等小食，就冇晒錢，惟有行返屋企。」行得多又吃太少，沙律自嘲初中身材超瘦，完全冇睇頭：「初中得70幾磅，一支竹咁，係之後去外國留學先肥。」
文：影視組
攝：張福宏