藝人杜汶澤主持網上節目前晚首播，約半小時的節目邀得江若琳、「澤女郎」貝依霖及「性專家」何慕詩等亮相。與網友即時互動期間，阿澤甫開始已被質疑「飲大咗」。節目中為「營造氣氛」，阿澤等不時爆粗，網民睇得爽，但搞到站在中間位置的江若琳表現靦腆，不懂如何畀反應。
對於被質疑「飲大咗」，事後阿澤回覆記者，澄清只是血壓高：「可能之前飲得酒太多，所以最近有血壓高。照醫生吩咐每日食藥控制，唔算太嚴重，係塊面比較易紅，多謝關心！」對於有指一度被阿澤力捧的楊浩兒（Double May）不敵新寵貝依霖，近日遭投閒置散，更於節目內完全消失！阿澤回應：「只係暫時冇合適工作畀佢啫，冇話失唔失寵嘅，你估我係娛樂大亨咩！」