陳豪搣老牛聲Chok高音

陳豪及森美昨日到太古宣傳配音真人動畫電影《比得兔》，吸引大批市民一家大細捧場，兩人即場玩扮聲遊戲，場面搞笑！今次他們延續電視劇的HeHe情，森美笑說：「今次係HeHe、HaHa，充滿笑聲，佢聲演我表弟，聽晒我話，同劇集唔同！」

被森美笑下次演公公

第一次為動畫配音的陳豪表示要全程Keep住高音，不再老牛聲，比平時高了個半Key，森美說：「開頭聽佢配音把聲以為係專業配音員，把聲完全唔似佢，驚一驚！下次佢唔使演皇帝，可以演公公！皇帝留畀我演，幫朕Check吓！」

活動後兩人接受訪問，陳豪直言配音相當困難，加上今次要聽英文翻譯及其他人配法更是難上加難，問會否不習慣如此高音？他笑說：「我以前沙聲好低音，但做咗手術之後已經高番，時高時低，我聲底其實係高Key(口架)！同埋有小朋友之後都慣咗高音，要講故事氹佢哋。」森美笑說：「我以為佢揸住自己個重要部位嚟配音，所以先咁高音。（講緊邊度？）男性會明白，男仔最突出嗰度，我講喉核呀！」

「大賓」生殖能力強

問到復活節會否陪小朋友玩？陳豪表示一家人經常一齊相處，但也希望安排時間出國旅行，並指三位小朋友坐飛機冇問題，大仔一歲前已坐過三次飛機。提到前港姐劉倩婷日前為女兒開生日會，請了陳豪一家，有指倩婷女兒Mark實陳豪大仔，陳豪即哈哈大笑，問有否找倩婷老公李丞責擺風水陣再追仔？陳豪說：「冇！邊有，不過我生仔能力較強，暫時二比一（兩仔一女）。」森美笑說：「佢生殖能力同兔仔一樣咁強，佢角色叫賓仔，真人係大賓，因為長大咗喇！我本身都強，但喺佢身邊都甘拜下風！」

文：影視組