李幸倪預告晒「線」露背熱身

昨日個唱記者會在戶外舉行，Gin Lee特別來個預演，即場進行五分鐘的騷Quali靚聲演唱。身穿間條恤衫及黑長褲打扮的她，轉身時展示大露背，即變「影後」搶Fo。司儀問到個唱上可會騷性感？Gin說：「識我嘅人都知我鍾意挑戰新事物，自己都未試過有腹肌、乜線物線咁！我都預告會畀大家一啲驚喜，總之會有『線』睇。」Gin在演唱會海報上染成一頭紅髮，寓意鴻運當頭，希望在紅館能有耳目一新的感覺。

會後受訪時被問到打算晒「線」是否指馬甲線？Gin說：「係喇！盡力啦！（事業線大家都收貨！）係咪總之有『線』就得？我知，我會記得嘅。」她笑言自覺骨子裏很性感，會隨音樂釋放出來，問到可有底線？她說：「未知(口架)！對我嚟講就靚為主，其實都冇乜底線！當然唔可以走光，就算Bra top都冇問題，但如果就住就住會表演唔到、唔夠自如，所以靚同安全係兩大前提。」又指現已為個唱排練，每日至少花五小時排舞及Keep Fit。

李幸倪即場靚聲演唱五分鐘，一個華麗轉身先知好戲在「後」頭！	李幸倪開定香檳，預祝演唱會大賣。	李幸倪獲送上歌迷心意卡，化為動力做好處女騷。

家人組團來港撐場

提到可會邀請嘉賓？Gin自言心目中有天王天后人選，問到可會趁周杰倫正在港開騷提出邀請？她二話不說：「梗係想！上年有去睇佢演唱會，呢次都想去睇，若果有機會見到佢，都會同佢講吓。」講到首個紅館騷只開一場，Gin坦言太少：「希望大家支持支持，等我可以加場！」又透露身在馬來西亞的家人、朋友及同學計劃組團來港捧場：「都有一百幾十人o架！唔知有冇酒店同機票贊助吓。」

文：音樂組

攝：李伯儒