靚靚 阿佘破冰碰杯張智霖硬晒
藝人張智霖（Chilam）與太太袁詠儀（靚靚）、佘詩曼、吳鎮宇和張達明等，昨日出席「耳東影業大型發布會」，分別為主演的電影《洩密者》和《家和萬事驚》宣傳。Chilam與阿佘2000年拍攝無綫劇《十月初五的月光》時傳緋聞，令靚靚「踩場」探班，故三人同場成為焦點。
起初三人未有站在一起，到大合照祝酒時，最期待的畫面終於出現！Chilam站在阿佘與靚靚中間，大家未有互望，Chilam的表現更有點生硬，最後由阿佘打破僵局，主動與靚靚笑晒口碰杯。及後阿佘被問可有尷尬？她說：「冇呀，點解？（你哋之前傳過緋聞。）啲人寫啫。」旁邊的Chilam即說：「寫啲人別有用心。（你哋三人試過同場？）試過，Party常見啦。」提到他站在兩女中間時硬晒軚，他說：「唔通軟晒咩？軟皮蛇呀？其實我企錯位，唔知下面有貼紙（指定位置），原來個位係達明。」阿佘即取笑他老花。
「唔係好熟咋」
靚靚亦被追問老公的「硬晒軚」表現，她說：「吓？好正常啫，有乜出奇？佢企喺我身邊唔硬晒，咁企喺邊個隔籬會硬晒呢？（企阿佘旁邊囉！）我哋都熟。（有幾熟呀？）唔係好熟咋！不過公開場合都會打招呼，以前去探Chilam班都有見過幾次，呢啲係正常禮儀。（頭先尷尬？）點解呀？（佢哋傳過緋聞。）我都同好多人傳過緋聞，而Chilam都有同好多人傳啦，咁我哋咪好唔得閒！大人啦，唔係細路，冇乜好尷尬！」其後她皺眉稱：「結束話題啦！」
文：影視組