自細受金句啟發 陳慧琳：BB一定好聰明

黎明親證將做爸爸，圈中好友紛送祝福，曾與黎明被喻為幕前金童玉女的歌手周慧敏昨晚出席活動時，稱有留意黎明榮升人父的報道，她送上祝福說：「恭喜佢！（會唔會好愕然？）唔愕然，結交另一半組織家庭係好自然嘅事，好戥佢開心。」至於曾與黎明合拍電影的陳慧琳說：「恭喜黎明，小朋友一定會好聰明，因為由細到大都得到爸爸金句嘅啟發！」好拍檔音樂人雷頌德亦說：「我梗係恭喜佢，之前我真係唔知，聽到呢個好消息梗係好好。（會否同佢分享做老竇心得？）佢咁叻，唔使問我，不過如果有需要，我可以分享我啲經驗畀佢，佢可以嚟問我。（你係叻老竇？）我唔叻，做老竇都幾難。」而曾與黎明合作拍劇《阿Sir早晨》的古天樂說：「好意外、好開心、好高興，做父親係另外一個世界，戥佢開心。」已為人母的袁詠儀大表驚訝：「嘩！咁爆！但始終都係喜事一則，恭喜黎明能夠搵到一個人同佢一齊度過人生，亦都祝福佢嘅小朋友可以喺健康嘅環境長大，希望佢同家人一路開心到永遠。」