李幸倪由劏房迷入紅館
入行9年的歌手李幸倪（Gin Lee），與舊公司完約後曾有過長達兩年的迷失期，生活拮据，日夜爆喊！如今終於捱出頭，如願於6月23日假紅館舉行處女騷《Gin Lee李幸倪First Of All Live Concert》，她特意帶記者重遊舊寓所附近，重溫「迷失期」的點滴！
唔敢出街
除了忙於籌備廣東及國語新碟，Gin Lee正密鑼緊鼓備戰演唱會，她說：「與其話係演唱會，其實係一套兩個幾鐘嘅電影，同大家分享我嘅人生故事。」其歌手生涯起起伏伏，2014年她與舊公司完約後「迷失」了兩年，當時居於北角劏房的她僅活躍於北角碼頭一帶：「成日嚟呢度散步，坐喺度食粥望海，嗰時喺香港冇朋友，好多時都係周圍行吓。（經濟狀況點？）慘囉！手停口停好潦倒、好大壓力，又要交租，仲第一次冇勇氣出街，驚見到嘢想買都買唔起！」而她最大的困擾是不習慣向人傾訴，包括家人。
同事接濟
Gin Lee又說：「嗰時我每日都淨係食屋企現有嘅食物，有啲舊同事知道我情況，我冇講，但佢哋察覺到，會帶食物同買埋衫畀我着。」日日爆喊的她曾想過放棄，幸好夠樂觀，提醒自己撐落去！談及處女騷，Gin Lee希望音樂行先，但亦會表演舞蹈，又笑言會挑戰性感衣着「派福利」。
服裝：MEIKING NG & S.Nine by Susanna Soo
文：音樂組
攝：吳文聰