張敬軒扮騎師Fans中計
歌手張敬軒不時被網民惡搞與人撞樣，軒仔一於化身「孖生兄弟」南非騎師麥偉利到旺角玩「派碟」，更聯同老友麥長青一起整蠱Fans！事後軒仔大呼過癮，透露今次扮嘢由神情到裝扮都落足心機。
軒仔講過2018年是「找數年」，除了開演唱會和出碟，揚言要親自向粉絲派碟，日前終於在社交網站上公布派碟名額15個，要寫出張敬軒三個優點，然後由他親自挑選得獎者。
騎Dahlia出場
前日軒仔終於「找數」親自做送碟專員，還孖住麥長青（麥包）一齊度橋整蠱粉絲。軒仔首先上載一條片段，一身騎師Look的他聲情並茂地自稱「香港麥偉利」，並介紹其「愛駒Dahlia（諧音：打你呀）」，在片尾通知得獎粉絲去麥花臣球場找一位拿住紅白藍袋的「麥先生」。當粉絲到場後，以為真是「麥偉利」時，卻發現出場的「麥先生」是麥包，正當粉絲被麥包分散注意力之時，軒仔騎住Dahlia自帶音效「啊~啊~啊~」High爆出場，場面搞笑。之後，軒仔才把有大大個「廣」和「東」字樣的陶瓷「廣東碟」送給麥包和粉絲。
變老翻麥偉利
事後軒仔大呼好玩，並解釋自從扮過愛瑪沃森（Emma Watson）後，很多人指他似麥偉利：「咁今次送碟畀Fans，就用個特別啲嘅方法，於是就扮麥偉利啦！」今次扮嘢，軒仔由神情到裝扮都落足心機，一絲不苟：「隻公仔愛駒係喺網上買嘅，套衫特別喺英國訂番嚟。送碟前一晚我喺屋企練習麥偉利嘅笑容，同埋佢嘅『OK』招牌手勢，仲有最緊要係策騎動作。」
文：音樂組