吳啟華改口風Buy萬子認抵打

無綫經典劇《流氓大亨》正於晚上重播,萬梓良(萬子)痛毆吳啟華的場面再成網上熱話,當年被真打的啟華嬲到走人。事隔多年他已釋懷,表示很認同萬子的認真做法,萬子亦表示很欣賞對方。至於同劇的鄭裕玲笑言當時個個演員都怕被萬子打,結果自己亦遭殃。

由萬梓良、鄭裕玲、吳啟華及劉嘉玲於1986年主演的經典劇《流氓大亨》正在晚上重播,當中不少場面至今仍令人津津樂道,日前播出啟華被控謀殺親父兼自爆玩弄周海媚感情,但最終無罪釋放,飾演其失散兄長的萬子在法庭外將整個垃圾桶掟向啟華再痛毆一頓,啟華當堂額角腫起,效果超逼真,原來當時是真打,事前啟華並不知情,當時啟華嬲得一聲不響駕車離開,萬子其後送上古董錶道歉。

打到腫?成日會受傷!

啟華於兩年半前受訪時表示對此幕歷歷在目,承認有唔開心,但昨日再提起此事,已釋懷的他認同萬子的做法:「呢個階段再拍呢場戲,我同意萬子嗰種狠勁,都唔死得(口架)嘛!效果好都值得!(你個頭腫咗喎!)拍戲係咁,成日會受傷,我同意咁,會好睇,我幾佩服呢個前輩態度認真,值得我哋學習,真係唔錯!係我當時年紀小,少爺脾氣多啲,依家一定唔會咁做,只會盡力配合萬子。」至於萬子亦讚啟華是他很欣賞的演員:「他在劇中演出非常出色,依稀記得當年他才22歲,前途無量!」他又指很高興劇集重播都能得到觀眾支持,很懷念跟一眾台前幕後合作的日子。

鄭裕玲:好彩一Take過

至於鄭裕玲(嘟嘟)亦有在電台節目中講起當年拍攝點滴,直言當年啟華被真打,一眾女演員的驚慌樣都是真表情,之後大家立即睇劇本看看是否有被萬子打的戲份,結果周海媚之後被對方摑了十多巴,自己亦未能幸免:「唔記得呢套劇定《生命之旅》要畀佢摑,我睇劇本都睇到手震,導演都話好近鏡可以唔使真打,但萬子就同我分析要真打先有效果,我冇嘢好講,畀佢摑到牙骹都甩埋,好彩一Take過。」

文:影視組