師兄踢波發洩封嘴避談「分」訊
劉浩龍與容祖兒5年情玩完，甩拖的師兄對分手一事一直未有回應，昨日下午2時許他驅車離開貝沙灣寓所，前往九龍灣球場會合吳家樂、羅家英、張兆輝及林敏驄等人踢波，落車時師兄被追問分手一事，殘爆兼眼腫腫的他只強顏歡笑，未有答話，而身旁的羅家英見狀亦幫口「擋駕」，向記者說：「嚟踢波問啲咁嘅嘢嘅！呢啲假象嚟，宣傳嘅啫。」
及後師兄與羅家英急步入球場準備開波，落場時師兄明顯表現落力，情傷的他實行狂踢波發洩，見他踢足全場未停過，完場後他便頭耷耷獨自取車離開，記者上前追問與祖兒分手一事，他繼續封口不答，只表示買完咖啡及入油後便會返家。
此外，昨日師兄於社交網上載穿上球衣晒V照，並留言指自己入了一球死角球靚波：「好開心好開心。」之後再上載下廚低溫慢煮雞胸肉的照片，並大讚好食。