阿佘孖「許文強」架勢空降石崗
藝人佘詩曼和黃子華昨日為宣傳賀歲片《棟篤特工》，乘坐直升機架勢地空降石崗，令直升機場風起雲湧，兩人以黑白配打扮襯到絕亮相，其中子華以「許文強」Look現身。落機時，子華扶實阿佘，盡顯紳士風度。至於電影公司老闆蕭定一，則以「踢死兔」禮服隆重登場。
蕭定一想拍續集
子華受訪時笑言同行不少人不守規矩：「個個都開電話用，我呢啲特工受過訓練好守規矩，佢哋冇呢個意識，爭啲想叫埋飯食。」問是否對票房有信心？他直言心態審慎樂觀。
阿佘被問到情人節是否要開工？她表示要繼續宣傳，問是否孖住子華？他秒速落閘說：「嗰日我會隱身，要做節。」但坦言之後或會喬裝入戲院睇反應：「以前試過黐假鬚、戴哨牙，反而仲多人望，搽黑自己算。」蕭定一則直認有意拍續集，問是否為氹子華拍多集才安排他上天下海？他笑說：「占士邦唔坐直升機唔通坐地鐵咩！」