劉溫馨執清「吉」屋迎桃花

無綫小花劉溫馨依照中國傳統習俗，實行「年廿八，洗邋遢」，被滿滿的番梘泡包圍。溫馨「出浴」之餘童心未泯，不時興起大玩泡泡，更笑說：「每到農曆新年，我都一定會將屋企執得好乾淨，加上今年我睇咗本書講人生嘅斷、捨、離，即刻將好多身外物捐晒出去。有個朋友幾年冇上過我屋企，最近上嚟第一句就話：『嘩，好乾淨同空曠！』」

返日本度歲

溫馨自返港發展後，一直自己照顧自己，事關所有家人都已移居日本，故今個農曆新年，她亦會「移船就磡」團年：「會返日本幾日，日本人比較重視新曆新年，所以我返去都只會同家人圍埋一齊睇吓電視、食吓餃子咁。好彩我喺親戚當中年紀比較細，所以成日收到大利是過肥年！」

劉溫馨望新一年桃花處處，有好劇本發揮。

劉溫馨用泡泡弄出不同造型。

靜待好劇本

談到狗年願望，事業心重的溫馨笑言希望有多多桃花：「桃花代表人緣，做得呢行梗係想愈多愈好啦。我生肖屬馬，屋企人話我知，狗年我應該會幾好運嘅，我就希望接多啲好劇本、拍多啲有得發揮嘅劇集。雞年我拍咗王晶嘅《荷里活有個大老千》，戲裏面演年輕版薛家燕，我覺得個角色有喜感之餘亦好有發揮，係一部我好期待快啲畀觀眾睇到嘅戲。」

文：影視組　攝：吳文聰

場地：beaustyle@佐敦