王浩信避忌閃入閘江嘉敏畀阿媽「追審」
藝人王浩信、江嘉敏、劉穎鏇及陳庭欣等，昨日到機場啟程往菲律賓為劇集《兄弟》拍攝外景。最近與江嘉敏傳緋聞的王浩信自行入閘，未有現身接受訪問，而江嘉敏被問到會否與王浩信保持距離，免得再傳緋聞？她說：「冇咩避忌，我哋只係傾劇本同感情戲點處理，咁都被人講，即刻完全唔講嘢！不過，我媽咪有問我單緋聞係咪真，我話：『你話呢？』媽咪知我今次又同劉穎鏇同房，叫我要同佢一齊出入，因為佢高大，但我哋盡量都唔外出！」
與劉穎鏇「She She」
劉穎鏇則說：「我同江嘉敏上次英國外景都係同房，感覺好溫暖。（驚唔驚輪到你同王浩信傳緋聞？）點解要驚？係都我同江嘉敏傳She She！」陳庭欣則表示帶備兩套泳衣：「得閒喺酒店做運動，劇中我唔使着泳衣，2月13日返嚟。（畀你返香港過情人節？）唔知呀，日子係劇組安排，不過2月14日我要陪外國返嚟嘅女同學周圍去。（另一半肯放人？）我唔鍾意做正日，人多又貴！（驚唔驚同王浩信傳緋聞？）唔驚，我選完港姐拍親善節目，已經同佢合作，之後幾個劇又係同佢拍，我覺得自己已經免疫。」
此外，無綫公布1月15日至21日七天跨平台總收視，王浩信與唐詩詠封視帝、視后的《萬千星輝頒獎典禮2017》錄得33.6點收視，約220萬名觀眾觀看（每收視點代表65,540名觀眾）。《溏心風暴3》結局篇則有28.3點收視，大結局錄得開播以來最高的30.8點收視，約有202萬名觀眾追看。
文：影視組