蕭正楠愛的宣言黃翠如嚇親！
藝人黃翠如及蕭正楠（Edwin）昨日情侶檔出席「Pricerite新零售概念店─旺角開幕禮」，Edwin被問到對未來家居的構想，他對着翠如大講愛的宣言：「最緊要有你！」事後又補飛說：「咁我都要請工人嘅！」
翠如笑言也是第一次聽，被Edwin嚇親，問到會否揀埋大床？她說：「我好鍾意睇家品嘅，之前去外國旅行都買好多煲煲罉罉，夠開餐廳！（Edwin肉赤？）咁我哋財政好獨立嘅！」情人節將至，翠如指男友要開工，她與家人去旅行，問到Edwin不是家人？翠如說：「未係住！其實我哋都好少見，未蜜月已經過咗蜜月期！」
Edwin笑言講完「愛的宣言」都打冷震，對翠如揚言彼此財政獨立，他說：「佢直頭係強悍添啦！不過我都希望佢將來可以使到我啲錢！（狗年拉埋天窗？）我忙開工，佢忙旅行，暫時未諗呀。」