古巨基奉旨篤周慧敏心口冇睇「全相」呻笨
作為「玉女掌門人」周慧敏演唱會總監的古巨基，大爆好友穿宮廷服時竟用手捽開「事業線」。因為基仔身份特殊，既可以用筆篤周慧敏個胸，又有機會睇到好友「全相」，惜最後忍痛推掉機會，令基仔大感後悔。
周慧敏（Vivian）前晚舉行第三場紅館演唱會，由擔當個唱總監兼好友古巨基做嘉賓，本來在控制台坐鎮的基仔出場前匆匆走到後台換衫，基仔甫上台笑說：「我原來係香港音樂史上第一個要仆到落台演出嘅總監。」引得觀眾大笑！自知身份特殊的基仔以「靚女」稱呼Vivian，他說：「靚女為呢個演唱會出咗好多力，好用心，你知唔知佢得番幾多磅？得番99磅，因為佢每天都排練、Keep fit想着衫靚啲，成個人瘦晒，之前有少少感冒未清晒，都堅持為大家帶嚟最好嘅演出。」
「捽開」事業線
Vivian穿宮廷服是演唱會的焦點之一，基仔連番以「靚女」的身材爆料，他笑言自己是除Vivian老公倪震之外，能睇靚女身體肌膚最大面積及睇得最多的人，他笑說：「網上睇到人話宮廷服好靚，但就話佢條事業線縮咗水，我覺得好冤枉阿靚女囉。」又指一般女星穿晚裝及宮廷服都力谷「事業線」，他說：「但靚女唔係喎，佢捽番開佢。」又扮對方用手在胸前撥走事業線的動作，全場爆笑，Vivian更笑到踎地，基仔續笑說：「冇嘅就死唧，但佢竟然捽番開佢，佢話『好肉酸嘅！』，我心諗你有一條事業線有幾肉酸呀，你有三條事業線我就話驚要捽啫。」
後悔咗十日
基仔又爆Vivian的一襲黑色鑲鑽晚裝，因鑽石要包住心口位置，他與設計師陳華國一同布陣，雖然Vivian穿了肉色衫打底，但就笑基仔是傻仔不敢在她身上畫，基仔即呼冤笑說：「因為攞支筆篤周慧敏個胸好怪，我做唔到、出唔到手呀。」其後基仔愈爆愈興奮，他表示因構思服裝而需清楚了解Vivian的身形，當時Vivian在布簾後僅穿Girdle（內衣），陳華國大叫基仔入去睇，但基仔怕尷尬而推卻，他笑說：「唔使喇，你睇啦！知唔知我講完呢句後悔咗十日，返到屋企好揼心，大好嘅機會，有幾多人可以睇到周慧敏着成咁？」
文：音樂組