被老公呃咗！楊張新悅佗第4胎
名媛楊張新悅宣布再度有喜，懷有第四胎，今胎她大搞新意思，與老公楊哲安、三名女兒一家人拍MV，大呻做大肚婆及人母的辛酸，更爆老公安全措施唔安全，以為三個夠晒數，原來被老公「呃咗」！
楊張新悅（Nicola）於2007年與楊哲安拉埋天窗，十年間先後誕下三名女兒，正當Nicola以為甩身，專心事業時，昨日她於社交平台宣布懷有第四胎，更上載由她主唱及以舊歌作新詞的MV《一不小心2018大肚婆》，還一家人齊齊出鏡，她大呻做大肚婆及人母的辛酸，認真搞笑！她接受本報電話訪問表示已懷孕三個幾月，未知BB性別，最重要身體健康，她說：「我想低調嘅，但發現出街見到自己又肥又肚凸凸，大家又眼望望，自己接受唔到咪宣布喜訊。」
又生又湊捱足10年
Nicola直言知道有B時很不開心，覺得被老公欺騙：「安全措施一向都係佢負責，我對藥物敏感，唔食藥（避孕），咁證明佢措施都唔安全。當知道再次懷孕都好唔開心，但都要接受，我有煩惱，因為係我生同我湊，大家都係拍拍籮柚就走，我諗住甩身，我係事業女性想重出江湖，但個天覺得我係應該留喺屋企湊仔！」Nicola又說首歌是有感而發作出，當知道有BB就有好多靈感：「你試吓生第4個，大女9歲、細女3歲幾，我人生呢十年照顧BB，冇得玩，病又唔敢食藥，咖啡又唔飲得，生完又擔心BB會病，餵奶餵到胸痛，呢啲片段不斷浮現，所以大肚婆同媽媽會有共鳴。」她又上載了大女Lucy的生日照，十分溫馨。
文：名人組