蘇永康帶病撐復台睇長遠合作？
歌手任賢齊（小齊）、蘇永康及林子祥昨晚現身亞視復台活動，先後獻唱自己的首本名曲博得全場掌聲雷動。林子祥完成演出後，未有停步受訪。而小齊受訪時說：「今次係我第一次嚟亞視。復台係好事，香港藝人好優秀，冇畀佢哋發揮嘅平台好可惜。」談到旗下藝人梁漢文日前的涉醉駕事件，小齊坦言：「佢知錯(o架)嘞！事情發生咗佢都好後悔，亦發咗聲明同大家道歉，希望各界可以畀機會佢。佢其實係個好人嚟嘅，做嘢亦都好畀心機，嗰日可能太開心，做咗啲唔應該做嘅事，佢未來會努力面對自己嘅過錯。（安排佢停工？）本來同佢搞演唱會嘅，但依家要討論吓係咪繼續，況且佢都有法律問題要解決。其實佢好多嘢都停咗，睇吓日後件事發展落去點先。」
蘇永康則指自己帶病上陣，同樣覺得亞視復台是好事：「點都多個平台嘛！（好多人唔睇好。）年半前邊個會諗到亞視可以復播？世事無絕對，唔可以咁快下定論。（傾合作？）依家都合作緊啦，睇吓長遠有乜合作可能性。（打動你拍劇？）咁要搵監製鄧特希返嚟先得。（亞視話拍《英雄本色》，你有興趣？）有劇拍當然好，但最緊要係劇本，劇本唔掂就唔得。」
另外，為吸引觀眾，亞視復台即大開水喉派錢，司儀叫觀眾答問題，答中即獲總值$33,920的名貴手錶，皆大喜歡。
