舊愛徵婚？陳瀅否認同猷亨復合
宅男女神陳瀅現身銅鑼灣鬧市，久未露面的她，原來之前返溫哥華探望婆婆兼到美國充電一個月，透露滑了多次Snow Broad不慎跌傷膝頭，她說：「我發覺Snow Broad係後生先做到，過幾年應該唔得，今次都跌傷膝頭，已經滑得勁咗，我拍咗條片放IG，好多人話好有型，連我都覺得好有型。」
陳瀅曾與賭王何鴻燊兒子何猷亨拍拖，被問到猷亨的胞弟猷君踢爆哥哥單身兼為哥徵婚一事，陳瀅表現愕然，她說：「咁嚴重？（之前傳你哋復合？）我單身，唔知佢係唔係，我哋暫時係朋友關係。（有冇聯絡？）間唔中，講番青蘭啦！」她扯開話題談及正在播映的無綫新劇《平安谷之詭谷傳說》，飾演青蘭一角的她，在墓地場戲要跌在泥窿，好多泥冚落頭，她形容那刻好大心理壓力、好驚，相信遲些可挑戰拍鬼片！至於日前的台慶頒獎禮，她當時正在飛機上，落機立即看賽果，並已恭喜唐詩詠和蔡思貝。