黎小田任爆唔嬲：鍾意講咩都得！

寫過七百首歌的著名音樂人黎小田（Michael），將於下月17及18日，即大年初二及初三假紅館舉行《小田金曲50年作品演唱會》。他坦言今次開騷最麻煩是揀歌，要由七百首歌篩剩三十首，而且有些歌手已經離世，例如張國榮、梅艷芳等，故找來其他歌手獻唱他們的作品，如許志安、陳曉東及內地歌手崔子格等。而好拍檔薛家燕都會來支持，Michael更安排了廿個舞蹈員為她伴舞，唱出梅艷芳的《再共舞》，他笑言：「佢啲十字步、Cha Cha可以跳番出嚟。（你會開金口同家燕姐合唱？）我諗我會唱少啲，開頭隻《家燕與小田》梗係出嚟又跳又唱，之後就交個台畀佢，我喺台上指揮同彈。」

遺憾關正傑婉拒出山

而其他表演歌手還有王馨平、陳美齡、葉振棠、麥潔文、曾路得、黃翊、黃百鳴和柳影虹等，年輕一輩就有衛蘭、衛詩及側田等，但已退出樂壇的關正傑則婉拒出山，Michael坦言遺憾，但已找到周華健唱他的《大地恩情》及成龍的《英雄故事》。講到如此多好友來支持，可擔心他們在台上爆料？他笑言：「我冇嘅，我有咩爆呀？你鍾意講咩都得，唔怕啦。」他亦透露會邀請好友馮寶寶來捧場，笑言：「等佢爆吓我啲嘢，但佢未覆到我。」

堅信廣東歌不死

另外，對於外界經常指廣東歌已死，Michael認為與內地重本炮製音樂節目有關：「佢哋真係錢多，可以請啲人才上去，例如周杰倫、陳奕迅都肯做，甚至拍手嗰個出到鏡都有利是，所以點頂呀？同埋上面有13億人，實有人唱得好。」但他認為廣東歌不會死：「起碼有廣東省、香港、澳門講廣東話，仍然有人繼續聽、繼續作，但可以執吓啲歌詞。」他亦勸勉歌手要勤力：「張國榮、梅艷芳都係自己努力緊要啲，唔係話捧佢就會紅，唱歌最緊要畀心機，先出兩、三隻碟，唔好太多兼職，例如拍戲、拍廣告。」

文：音樂組

攝：張福宏

場地：皇家太平洋酒店Pierside Bar & Restaurant