張茵編演英劇揭華人面紗
歌手張茵與容祖兒、張栢芝等同期出道，最近她自編自演英國BBC的劇集《Chinese Burn》，希望打破外國人認為中國人神秘兼沒有才華的觀念！她早前更踏足荷里活，參演占士邦系列電影，自言從此改變其演藝生涯。
曾是天王黎明同門師妹的張茵，1999年憑歌曲《A Trip To The Moon》，引起樂迷及英國唱片公司注意，出了第三張唱片後，2006年便與英國唱片公司London Records簽約並到當地發展，豈料該公司其後竟關門大吉，但她從沒放棄，轉投新公司後便主力寫歌。
不過無心插柳下，她亦開始拍廣告兼演戲，展開其演員之路：「我從來冇諗過，因為覺得自己係一個音樂人，唔會做戲，但後來做做吓收到個劇本，佢哋嘅戲係好有挑戰，所以我就慢慢開始做演員。」
帶挈工作不斷
演員之路絕不容易，但張茵憑着其努力和幸運，早前更有機會踏足荷里活與占士邦合作！她坦言不但心情興奮，更自爆荷里活的威力令她工作不斷：「因為一直喺英國都有拍BBC嘅電視劇，之後有機會被邀拍占士邦《Skyfall》（新鐵金剛：智破天凶城）裏面一個叫做『Floating Dragon Cashier』嘅角色，仲同Daniel Craig（丹尼爾格力）有一場戲份。雖然只係一個好細嘅角色，但係導演拍得好好，令人印象好深刻，亦令更多人認識我，所以我嘅演藝生涯開始變，更愛上咗演戲，開始出現更多機會。」
唔會放棄音樂
由演藝初哥，到逐漸擔任重要角色，張茵早前更成為BBC劇集《Chinese Burn》的女主角之一兼編劇，全因她希望能夠打破外國人對中國人的舊有觀念和一圓做喜劇的心願：「因為中國人喺外國始終係一群好細嘅部分，好多外國人都誤解我哋，因為佢哋覺得中國人係好神秘兼冇咁有才華。而我亦一直都好想做喜劇，因為我知道身為中國人，喺外國係好難做到喜劇，所以我就同朋友講不如我哋兩個人寫劇本，最後仲得到BBC欣賞，製作成為劇集。」即使身份有所改變，但張茵自言依然熱愛音樂：「我一直都有繼續寫歌，所以就算多咗演戲嘅部分，都唔會放棄音樂！」
文：專案組
攝：吳文聰