呃吳鎮宇開夜班君如累方中信生頭瘡
影后吳君如最近自導自演新片《妖鈴鈴》，找來吳鎮宇及方中信兩位型佬參與，當中後者更禿頭示人。日前君如接受訪問，表示平日看慣方中信Chok樣，故趁機醜化一番，沒料首日開工便令對方生頭瘡，故承諾會包起其按摩頭部費用作補償。而已不接夜班戲的鎮宇，最終卻被騙連拍了40多天，還要於4層樓高吊威吔打喪屍，故也忍不住指君如瘋狂。
雖然難為了他們，但君如亦大讚二人喜感強：「我畀假髮鎮宇戴，男人最驚髮線向後同甩頭髮，所以成日見佢撥住把髮，好好笑，我仲叫佢模仿80年代嘅近滕真彥。」
同陳可辛嗌交擔心分手
談到處女執導還要分身演出，君如直言難度比為人母更要高，故特別安排另一半陳可辛出任監製一職，她笑說：「我兩年冇收入，依家可以收埋陳可辛嗰份，同埋佢好多嘢可以幫我把關，但當然有意見分歧，嗌到面紅耳赤，都擔心拍完呢套戲小則分房瞓，大則會分手，同埋套戲拍好耐，我哋成日唔喺屋企，搞到個女鬧情緒，所以拍完之後有共識，如果我哋再合作應該係10幾年後嘅事。」
君如又指今次找來已故化妝大師陳文輝孫仔陳嘉偉負責喪屍妝，又花了2千多萬於番禺搭景，完成4個月拍攝期後，為免日後成為電影的濫拍地，最終選擇把整個景炸爛，相當肉赤。
文：影視組