鄧佩儀拒人千里掛牌入戲
華姐出身的鄧佩儀（Gloria）拍劇機會愈來愈多，最近有份參演重頭合拍劇《再創世紀》，備受力捧，與周柏豪及袁偉豪（Ben）有大量對手戲！做事認真的Gloria若要準備情緒較激動的戲份時，都會企埋一邊培養感情，又或者成個人靜晒「唧都唔笑」，她說：「開頭Ben同柏豪唔知道，會撩我傾偈同引我笑，我就擰轉身表示唔想畀人打攪，慢慢我哋愈來愈有默契，佢哋都好包容我。」
日前Ben送上一塊寫着「入戲中」的牌當作生日禮物，Gloria笑言既窩心又搞笑：「之後我真係會用，我一掛住個牌，唔使講嘢大家就知我入緊戲！」