楊明想飲住家湯投訴女友冇影

藝人王浩信、楊明（Mat）、陳庭欣（Toby）與何君誠等，日前到位於錦田的貨櫃場拍槍戰戲，劇情講述飾演保鏢的Mat率領Toby與君誠保護浩信免被殺手所害，穿皮褸的Mat全程Chok到爆，輕易KO多名殺手，相當搶戲。

Toby起飛腳

演女保鏢的Toby透露已做好準備，隨時即場加動作戲：「知有動作戲會早啲瞓，到場會再拉拉筋！今次喺接近兩米高度跳上跳落，又要起腳踢武師，前後踢咗近廿次，勁唔好意思！」Toby深知身為動作演員好辛苦，因此特地準備湯水慰勞大家，問兩位拍檔的另一半有否探班？Toby笑言：「佢（楊明）好Dry呀！見我仲多過見Liza（女友莊思明）。」

而Mat透露今次有機會揸真槍拍攝，提到他與浩信被指撞樣，Mat則說：「佢好鍾意講笑話引我笑，搞到我好易失場。」浩信則指大家都「大細路」。講到Toby受莊思明所托睇實Mat，他對女友未有探班似乎有微言：「係啦！人又冇嚟探班，嘢飲又冇送嚟喎！（Toby煲湯慰勞你哋？）係呀！我都想有住家湯飲，一日一碗人都健康啲、開心啲啦！」

王浩信拍動作戲前先拉筋熱身。	王浩信與楊明被指「撞樣」，到底有幾似？	莊思明

戒口操肌

浩信因被追殺四處逃竄，提到慘被同場的Mat搶戲，他笑言：「我今日都算係最輕鬆嘅一場，今次套劇算少動作，但之後都要上擂台打。（晒肌？）梗係要，有伍允龍喎，同佢Battle吓！（食素影響體力同操肌？）唔會，反而成個人精神咗，皮膚仲好咗！之後仲要食番少啲，注意番蛋白質補充就冇問題。」

陳庭欣在兩米高貨架跳上跳落。

陳庭欣

文：影視組

攝：司徒國榮