陳爽母乳做禮開心Share人奶梘
藝人陳爽（Sherry）雖然已是兩個小朋友的媽咪，但身形依舊Fit到漏，她透露懷第一胎和第二胎時，體重只增加了約28磅，絕對是肥肚不肥人！堅持餵母乳的Sherry自爆奶水足，多到可以做人奶番梘及轉贈他人！
陳爽認為減肥是女人的終身事業，所以懷孕期間亦勤做運動，她說：「佗第一胎同第二胎都係重咗13kg（約28磅）咋，冇特別話好想食咩，但都有叫老公買嘢食，係女性專利，大晒！例如我好想食叉燒飯、燒鵝，當時已經係夜晚12點，佢上網睇吓邊度仲有開，就同我出去食。」她指老公不是浪漫型，但對她無微不至：「佢會煲湯，Plan晒啲嘢，好實際，我會話『你唔讚吓我嘅？你讚吓我靚啦！』」
佩服在職媽咪
Sherry是兩位小朋友的媽咪，她明言支持餵哺母乳：「我覺得一啲都唔容易，係好堅持嘅一件事，有人問出街咁多種奶粉選擇，點解仲要餵母乳？又要三、四個鐘起一次身，又泵奶。我認為餵人奶係畀小朋友嘅禮物，做到就做，更加佩服啲在職媽媽。」她續說：「大仔餵到6個月，細女超過佢，未諗幾時停，睇佢啦，生咗牙仔唔咬我嘅話，我會繼續餵。」
大仔打翻醋埕
Sherry坦言奶量充足，會將多餘的人奶製成番梘：「細女唔食凍嘅奶，我諗咗好多方法處理，例如整番梘。有日有個女仔行埋嚟問我賣唔賣人奶番梘，我話唔會啦，因為係我嘅奶，好多人介意，我話送畀你啦，咁樣我都開心。」問到兒子可有呷妹妹醋？Sherry自言有一套教子方法：「直接抱細妹佢就呷醋，我抱之前會問佢『可唔可以抱吓你先？抱完你可唔可以抱妹妹？』佢又OK，佢會覺得地位受認可。」
文：專案組
攝：張福宏
髮型：Ling Chow@Private I Salon
服裝：LUYSHON
場地：K.H.WorkHouse@Tai Ping Shan Street Gallery