鄧月平隨時跳掣自封女神……經

現年20歲的藝人鄧月平（Larine）入行一年突然踩過界進軍樂壇，推出首支單曲《女神經》成為今年女新人，她表示從小已對唱歌充滿興趣，今次出歌是公司送給她的禮物。講到新歌，她透露講述一個「當兵」的女生遇到心上人時會變得如「女神經」般緊張及神經質，坦言當中有少許個人經歷：「當年我暗戀一個男仔，我問佢鍾意咩類型嘅女仔，佢話鍾意文靜，我嗰時係田徑校隊，之後即刻乜都唔玩喺度睇書，轉一排佢話依家鍾意曳啲嘅女仔，於是嗰排我就勁曳，但過一排佢又話鍾意純啲嘅女仔，我就即刻扮到好乖，所以就係歌詞所講『剎那百厭會瞬間變乖』，但我哋最後都冇一齊。」

寧搵錢唔搵仔

不少人封Larine為女神，但她就自封「女神經」，因為愛遊魂、愛幻想，偶然會「跳掣」：「有啲人會覺得好扮嘢，有啲會話好Kai，各花入各眼。」問到可試過嚇怕男仔？她說：「90後有個特點，尤其係90尾，就係唔介意直接話畀人聽我就係我，可能大家會認為我係『跳掣』，但最近我識咗啲細我一、兩年嘅，原來仲跳掣。（搵男友想搵同樣會跳掣嘅人？）我冇乜特別要求，大家心靈上溝通到，坦誠就OK。」講到感情現況，她坦言是零：「一忙起上嚟，成個心機同時間都花喺工作，冇以前得閒嗰陣咁想拍拖，想賺錢養屋企人先。」

鄧月平曾為暗戀對象不斷改變自己。

鄧月平踩過界唱歌，成為樂壇女新人。

唔夠女人味

講到第一首歌曲風輕快，問有學鋼管舞的她可會試行女人味路線？Larine說：「我覺得未到30歲都未有女人味，如果有一日我覺得自己做好準備，我會嘗試。（性感得唔得？）如果到30歲時我身材未走樣，絕對唔介意，但如果走咗樣，我相信大家都冇乜興趣睇。」講到自封「Mini G.E.M.」，與對方同樣身形嬌小及擁驕人上圍的她笑言：「我好鍾意唱啲嗌嘅歌，細細個聽G.E.M.啲歌大，佩服佢係才女，啲歌好有意思。」她坦言視對方及樂壇每位前輩為學習對象，問有機會可想與G.E.M.合作？她說：「嘩！我未高攀到佢，儲多幾年經驗先。」

文：音樂組

攝：吳文聰

場地：White Button Cafe