黎瑞恩切除腹部6cm腫瘤
歌手黎瑞恩正積極備戰明年的紅館演唱會之際，突因腹部大過乒乓波的腫瘤引致劇痛，要入院做手術，情況令人擔憂，幸手術成功後，她親報平安指病情無大礙。其女兒由澳洲趕返港陪伴，與兒子一齊擔心得抱頭痛哭，但樂觀的她覺得生死有命毋須畏懼，還搞笑稱想趁機抽脂減肥。
現年44歲的黎瑞恩（小恩子）於3年前和金利來三少曾智明離婚後，獨自撫養一對兒女，至前年發現有兩個良性胰臟腫瘤，但由於腫瘤太貼近胰臟，故不適宜切除，現又發現腹部有腫瘤，不過腹部腫瘤與胰臟瘤並沒關連。雖然身體出現毛病，但愈挫愈強的她近年在女兒鼓勵下，重新發展演藝事業，近日除開了製作公司，明年4月更將重踏久別了16年的紅館，暫定舉行兩場個人演唱會。
現正為個唱練歌、練舞及收身的她，昨日突在社交網以幽默手法公開入院消息：「嘩，唔知喺手術室開live會點呢？」還上載一張頭笠手術帽，一臉驚訝的照片。據其感恩製作公司發言人表示：「小恩最近唔舒服，經醫生檢查發現腹部處有一個正在擴大的腫瘤，醫生建議趁腫瘤尚細，進行切除手術。」並補充小恩子昨早的手術非常順利，及指在腹部成功取出一個「小腫瘤」，現正休息中，更代小恩子向各歌迷表示多謝大家關心及慰問。
怕影響工作「引刀一快」
昨日傍晚終於聯絡上手術後的小恩子，雖然她聲線較細，但聽得出很精神，她報平安說：「我冇事，唔使擔心，只係做咗個個零鐘嘅微創小手術。（瘤係良性定惡性？）梗係良性啦！（傷口痛嗎？）梗係痛啦，少少痛，我冇事唔使擔心，好小事。」問到腫瘤有多大？她形容如又硬又黑的乒乓波：「佢（個瘤）大得好快，一個幾月大成兩個幾cm，個瘤都有乒乓波咁大，約5至6厘米，黑色嘅，由一個軟嘅嘢變成一舊硬嘅嘢，所以大家保重身體呀。」她又說不想朋友擔心，曾打算低調做手術，只是近期因入院要推掉不少工作，為免有不必要的誤會才在社交網交代。
小恩子指腫瘤是「突如其來」，因早前做身體檢查時未發現，但腹痛再去看醫生時才有「異樣」，本來醫生容許她可在明年演唱會後才做手術，但因腫瘤增長得太快，令她擔心：「如果演唱會前有事咪大鑊？不如做咗手術先。」考慮到近幾月還有錄音、排舞等一連串工作等着她，不容有失才決定引刀一快，她笑言：「依家做咗咪好囉，可以休息幾日再做嘢，我真係得閒死唔得閒病o架。」
想順便抽脂減肥
據知她入院做手術，女兒專程由澳洲趕返港陪伴，女兒與兒子在醫院期間更擔心得痛哭。問她可擔心有生命危險？小恩子豁達說：「唔使驚，有冇聽過閻王要你三更死，不可留人到五更咩，凡事樂觀面對咁就冇事囉，個天要你死就死，邊有得避嘅啫。」又搞笑說欲趁機做抽脂減肥手術，但因做手術前要禁食才打消念頭：「幾日都冇食嘢，又吊鹽水，肯定瘦啦。」
而小恩子演唱會主辦之一星娛樂執行董事Tommy Chu受訪時表示：「阿恩係入院『維修』啫，休息幾日就得，唔會影響個演唱會，可能佢近期搞演唱會又練歌，早排佢同我講喉嚨有粒嘢，擔心要做手術影響把聲添。我覺得佢係做嘢太辛苦，只係燥火上升。」他又讚小恩子善心爆棚，雖公、私兩忙，仍堅持一有空就揸車到深水埗派飯給弱勢社群。
文：音樂組