許廷鏗收三角褲嫌細！
歌手許廷鏗（Alfred）昨日出席新碟簽唱會，大批歌迷到場支持，其中有歌迷送上一條「神奇之褲」三角泳褲給他，Alfred驚訝地說：「肯定係我個Size？」又尷尬表示平日多數着Boxer，司儀周奕瑋搞笑地叫他到後台換上泳褲，他無奈笑說：「點解你哋咁嘅？你哋嘅底線咁嘅？」歌迷則解釋游泳可練體力，寓意Alfred練好體能早日登紅館，接着他與歌迷玩遊戲模仿MV畫面，又幫歌迷搽唇膏等，獻唱時則行落台與歌迷近距離接觸。
想登紅館跳十字步
Alfred之後受訪笑指嫌泳褲太細唔啱着：「估唔到佢哋會買咁細Size畀我，不過都幾正嘅，轉咗公司之後，粉絲嘅突破比我更大，佢哋話想我喺紅館着，我都希望如果去到紅館，身形又唔太核突，咁就試吓。」提到於紅館開騷，他坦言計劃中，但想先做一個導聽式的音樂會。至於席間表示想下一張碟做快歌，又講笑表示可以搵薛家燕一齊跳十字步，他說：「唔知請唔請到家燕姐呢？十字步我識跳。（你想跳舞？）我想有啲快歌，如果上紅館想有唔同曲風，全部慘情歌我都想喊。」他又表示新碟及新歌反應理想：「希望頒獎禮可以幫公司爭取獎項。（有信心？）希望啦，我年中開始簽（新公司），同事都好搏命幫我追成績。」
文：音樂組
