朱智賢認啱傾睇謝東閔造化
近百位小生及花旦前晚為無綫《萬千星輝賀台慶》排舞，一眾娛圈情侶成為焦點，當中的緋聞情侶謝東閔及朱智賢被要求合照時扭扭擰擰，謝東閔耍手擰頭、朱智賢則拉埋張寶兒與袁偉豪才影相。朱智賢直認與謝東閔啱傾，並鬆口說：「睇佢造化，了解吓先。」
無綫《萬千星輝賀台慶》今晚舉行，近百位花旦與小生前晚為開場舞綵排，不少娛圈情侶齊齊現身跳舞又放閃，包括袁偉豪（Ben）與張寶兒、楊明與莊思明及近日被本報拍得齊齊行街的緋聞情侶謝東閔及朱智賢，惟二人表現避忌，被要求合照時謝東閔即耍手擰頭，朱智賢邀請袁偉豪及張寶兒做「電燈膽」影相。袁偉豪相當「識做」，主動與謝東閔調位，令謝東閔及朱智賢成功合照。朱智賢被問是否與謝東閔拍拖？她說：「唔係！純粹出吓街啫。（得你哋兩個人？）我哋啱傾。（係咪拍拖？）睇佢造化，了解吓先。」明顯鬆口叫謝東閔落力追。她表示即使被影到二人行街，家人未有追問，問到謝東閔有何優點？她大讚對方有愛心又喜歡狗。
張寶兒未試台慶戰衣
張寶兒與男友Ben同台演出感到開心，雖然分開練習但對方有教她跳舞。談到無綫推行「限奶令」，問到台慶當晚衣着會否性感？張寶兒表示仍未試身：「自己嗰條唔係好性感，正常囉！（Ben介意你性感？）依家除咗賣性感，仲有好多嘢可以賣。（聽男友話？）我聽、我聽！」
文：影視組