卓林拖女醫肚食剩打包慳到盡
藝人吳綺莉的女兒吳卓林今天滿18歲，早前鬧出吳綺莉疑「閉門失竊」風波，但卓林繼續跟網紅女友Andi甜蜜蜜，日前拍拖到茶餐廳撐枱腳，被指收入不多的卓林更把食剩的飯餸打包，慳得就慳。至於吳綺莉指與女兒有聯絡，稍後才跟她補祝生日。
單親媽媽吳綺莉（Elaine）與女兒吳卓林今年因交友問題發生爭執，當時卓林只得17歲，Elaine遂向社工求助，及後母女和好如初。事隔數月，有指卓林厭倦校園生活，輟學離家出走，並搬到北角與30歲網紅女友Andi同居。
早前Elaine報警稱寓所有財物不翼而飛，疑閉門失竊，但戀愛大過天的卓林依然懶理，繼續跟女友甜蜜。今日18歲生日的卓林，日前約晚上7時，與女友到寓所附近的茶餐廳醫肚，二人排排坐，分別柯打了排骨飯及咖喱牛腩飯，兩杯凍飲插上孖飲管輪流一齊飲，席上二人有說有笑，Andi表情多多，氹得卓林笑咪咪。被指收入不多的卓林，見食唔晒即叫了一個外賣盒，將飯餸打包，期間煙癮頗大的Andi已急不及待擔住支未點的煙，與卓林前後腳離開餐廳，再返回寓所。
唔想太過阿媽Feel
卓林18歲便有自主權，隨時不再受母親吳綺莉管束，不過Elaine當然記得卓林今天生日，昨日她受訪時說：「咁大個女啦！生日慶祝呢啲嘢留番畀佢同啲朋友一齊玩啦！（補祝？）遲啲啦！（個女成年嘅生日冇得一齊唔可惜？）成年人仲要阿媽陪慶祝咩？（母女關係如何？）冇嘢，有聯絡、見面。（擔心女兒成年後拒絕你管束？）我邊會管佢，佢有佢生活，我都要識得愛錫自己，多扮靚、做運動，唔想太過阿媽Feel，要畀人感覺我似佢家姐！哈哈！」
文、攝：追蹤組