宣萱有獎攞唔敢鬆毛鬆翼
藝人宣萱昨日抱恙出席活動，談及在《星和無綫電視大獎2017》獲得「我最愛TVB電視女角色」，她表示當日因拍廣告而缺席，坦言最近工作量多，即使要交貴稅仍然高興。對於出爐視后李佳芯被指爆冷，宣萱直言對方年資尚淺，有該反應絕對正常：「1999年我攞視后都提醒自己，唔好有毛有翼！」
宣萱今年孭飛的劇集《不懂撒嬌的女人》及《使徒行者2》都反應不俗，問到可有信心攞視后？她說：「好難講，我返嚟拍劇唔係為攞獎，係想演個角色。（傳頒獎禮明年1月先舉行？）可能等埋啲台慶劇播晒，咪刺激啲、氣氛好啲囉！呢兩年多咗我哋呢啲老一輩返嚟拍劇，好多人懷念我哋個年代，頒獎禮入圍嘅人都係唔同類型，冇得一個人玩晒。」