胡琳帶鹹竹蜂出境驚扣關
歌手胡琳（Bianca）近日忙於為新廣東歌《一天也不能少》宣傳，她認為講了「幾十年」廣東話，唱歌時最易表達情感：「唱過唔少國語歌同英文歌，但用廣東話唱情歌特別好Feel，起碼個腦唔使翻譯就知句歌詞講緊咩。」。
Bianca為灌錄《一天也不能少》，以中醫秘方養聲：「其實都唔係咩秘方，我每次錄音都用鹹竹蜂開聲，睇落好恐怖咁，但萬試萬靈，所以習慣晒。我依家最頭痛係第三首廣東歌會飛去美國錄音，到時唔知呢啲鹹竹蜂可唔可以入境，畀人扣關以為我走私昆蟲就醜死怪喇！」她又指美國之行是寓工作於娛樂：「去睇騷唔好當我去玩啊，我係去吸收靈感！除咗錄音仲會同當地音樂人開會傾合作細節，但我唔會成日上社交網，費事公司知道我玩多過做嘢。」