祖藍爆亞男富婆 食軟飯等造人

藝人王祖藍與李亞男兩夫妻昨日拍拖到沙田九肚山新樓盤「尚珩 La Cresta」參觀豪宅，祖藍受訪時表示樓盤非常「啱心水」，還踢爆老婆的私己錢足夠買豪宅：「佢咁多私己錢，要諗吓點用喇！」亞男聞言即笑指老公「食軟飯」：「啲飯仲要係我煮埋！」問到心水盤的條件，祖藍即謂：「如果萬一要生BB，外父外母會過嚟湊，或者用作投資，但呢啲都係睇老婆頭。」至於幾時生BB？他透露明年會開始努力：「依家都好忙，工作排到年中。（工作停一停？）有咗先算啦！」

張曦雯預儲千萬置業

對於有指亞男曾患抑鬱症，她即澄清從未患病：「係啱啱結婚時老公去咗橫店拍三個月嘢，嗰時有啲唔開心，英文係有啲Depressed。」祖藍為老婆補充：「係翻譯問題，活躍就唔係有活躍症，有啲Depressed就唔係有Depression！」又笑指有朋友向老公推薦工作解悶，更有人送藥，亞男笑說：「真係多得你唔少！」

祖藍爆料指李亞男收埋唔少私己錢，旨意老婆買豪宅！

張曦雯預算要成千萬先買到樓，儲到眉毛都長。

講到祖藍有意捧老婆做女廚神，他踢爆老婆開工前為公司同事煮定愛心飯盒，明年更會出烹飪書：「佢有諗過去法國學藍帶廚藝，但又唔敢去，費事去嗰邊幾個月又再Depressed，學藍帶學到個人Blue咗。」

此外，無綫藝人張曦雯出席恒基地產旗下的鰂魚涌君豪峰記者會，尚未置業的她坦言仍儲錢中：「想買500幾呎單位投資或自住，希望會所可以做Gym。不過香港樓價好高，辛苦做嘢都儲唔夠錢，預算要200萬美金（約1,500萬港元）先上到車，同一個價錢可以喺美國買大屋！」

文：影視組