現年26歲的人氣英國唱作男歌手Ed Sheeran，日前宣布因單車意外受傷，要押後包括香港站的巡唱，他近日負傷現身清談節目剖白成名歷程時，驚爆2015年12月宣布暫別樂壇一年，原來是為了戒毒！
18歲入行的Ed Sheeran於2011年出碟即爆紅，多首歌曲膾炙人口，後來與天后Taylor Swift合作而成為好友，更橫掃格林美獎與全英音樂獎獎項，並密密開世界巡唱吸金！Ed近日於《The Jonathan Ross Show》節目中，首度自爆曾因無法承受成名壓力而沉淪毒海：「成名時冇真正可以成長嘅時間，我覺得加入樂壇係需要調節自己！我冇調節到，因為成日都巡迴演出。大眾平日睇到成名嘅陷阱，我全部中晒，譬如濫藥，當時我開始沉迷落去，所以消失一年去戒毒。」Ed自言最初只是在派對接觸毒品，後來變為獨自吸毒，被人發現後警告他要改變，最後決定休息一年！
Ed自言靠忘我地做音樂戒毒，因為於「受影響」情況下無法寫歌，所以專注工作能遠離毒品。他又特意感謝拍拖兩年的24歲青梅竹馬女友Cherry Seaborn，助他渡過難關：「我哋依家一齊住，佢真係令我貼地啲，我（當時）係個25歲開緊巡唱嘅音樂人，好需要有人作出平衡。」月前自爆愛品嘗杯中物的他表示現時已減少飲酒，生活似乎重回正軌。
此外，對於日前的單車意外，他笑言當時被撞受傷仍不知大件事，更去了附近的酒店飲酒，回家睡到凌晨5時痛醒入院，才得悉自己骨折，Ed說：「我想繼續開騷，但醫生話我如果再向傷口施壓，就可能以後都彈唔到結他。」據悉他至少需要休養4星期，Ed對於取消巡唱大感難過：「我係一個人獨腳戲演出，冇咗隻手就好似得番半個演出咁，所以要延遲幾場騷，感覺好差，今次係第一次取消演出！」
文：外娛組