洪朝豐確診舌癌有信心打勝仗

患有躁鬱症多年的57歲洪朝豐，昨早由大姪女陪同下到醫院取化驗報告，證實患上舌癌。下午他到油麻地看中醫，然後接受傳媒訪問。面帶笑容的他講述病情：「第幾期未知，要照磁力共振先可以決定醫療方案。」問到確診時心情如何？他表示心情平靜：「只係醫院好凍，醫生見到我震緊就覺得我好緊張。」問到病因？他表示中醫指與遺傳有關：「我爸爸有鼻咽癌，做手術3年後再有肺癌。我都有諗點解我會無端端得到呢個症，暫時我覺得同長時間憂傷有關！我媽媽喺95年有老人癡呆症，17年來身體、精神敗壞，後尾嗰幾年完全認唔到我。佢去世到依家有5年時間，我都好掛住佢，夜晚成日發夢夢見佢。」

醫藥費不成問題

雖然癌細胞已遍布脷底及牙肉部分，並出現黃色的膿，洪朝豐說話及飲食時都感到痛楚，但他仍然自覺狀態幾好及相當開心：「身邊好多人關心我、愛錫我。我想同媽媽講聲『唔使擔心我』。」可有信心打勝仗？他說：「我有嘅！如果成日愁眉苦面，對呢個病唔會有幫助。」醫藥費方面，他自言看政府醫生，加上有工作和積蓄，暫時不成問題：「我啲小學朋友、中學老師都有第一時間打電話畀我，問我需唔需要借錢，我覺得好幸福、好幸運、好好彩。」

想開特別音樂會

提到他曾透露很想重返廣播界，洪朝豐形容是自己的心願：「我唔知我嘅聲音可以維持幾耐，如果真係有機會做節目係幾美好嘅事，但我唔會強求。」他直言想開一場特別的音樂會，透過打坐技巧幫助觀眾靜心，然後才聽音樂。至於患病後可有跟圈中人聯絡過？他透露獲陳芷菁及鍾慧冰等分別介紹保健品及高人，很感謝大家關心。

文：音樂組