阿Sa見「龍婆」起雞皮 Chilam碎屍嗌過癮
藝人張智霖（Chilam）與蔡卓妍（阿Sa）早前合演懸疑驚慄電影，飾演變態殺手的Chilam直言肢解戲令他過足癮；阿Sa則自爆從不看恐怖片，向導演邱禮濤笑言未必出席首映，並指拍攝時最怕見到「龍婆」羅蘭，總覺得現場「有嘢喺左近」。
由邱禮濤執導的電影《陰陽路》系列成為港產鬼片的經典，首部作品於1997年誕生，20年後再推出《常在你左右》，由Chilam與阿Sa演出，邱禮濤說：「今年係《陰陽路》第20年，《常》片亦係《陰陽路》嘅第20集，當年《陰陽路》係古天樂第一套有角色嘅戲。」
蔡卓妍唔敢去首映
至於阿Sa四度與邱禮濤合作，四部電影均屬不同片種，她坦言從未看過《陰陽路》系列，並爆料指當初邱禮濤邀她參演時，她說：「我拍OK呀！但我唔睇鬼片，首映我未必到呀！」她又指拍戲時不算太驚，唯獨是與羅蘭拍對手戲時覺得震撼：「羅蘭做過好多呢類角色，佢一耍劍、撒米，真係覺得好似有嘢喺旁邊咁，同佢講嘢會起雞皮！」
邱禮濤透露Chilam戲中會自殺，被指令人聯想到近月發生的「Lan線自殺事件」，他直言5年前已開始構思劇本。較少演變態角色的Chilam將肢解林家棟的屍體，直言感覺不舒服：「心理狀態係唔舒服，因為拍戲係當真咁做，我未試過自殺，拍嗰刻會諗起家人。（肢解戲呢？）過足癮啦！唔知播出大家會見到幾多，當時投入去做，我真係有鋸過嘢（口架）！（怕？）唔怕，反而問應該點鋸！」
文：影視組
髮型：Vic Kwan@ii Alchemy（張智霖）、Sing Tam（Pi4.hk）（蔡卓妍）
化妝：Hetty Kwong（張智霖）、Natalie Soo.ki@NDnCo（蔡卓妍）
服裝：Kent & Curwen
造型：Fame Glory
場地：香港九龍貝爾特酒店