爆卓林同男仔拍過拖 吳綺莉氹女返家點都愛你！

單親媽媽吳綺莉（Elaine）與女兒吳卓林近年關係時好時壞，月前卓林輟學離家出走與外籍同性密友Andi同居，剪了一頭剷青短髮的卓林前日在網誌公開「出櫃」並說：「I'm gay！」之後Elaine雖一度冷言回應，但經過10小時的「沉澱」，Elaine昨日凌晨更新微博說：「No matter how，love you always. Bless」，意指無論如何都愛你，言詞間流露愛女情切。不少網民留言戥Elaine慘，但亦有網民指Elaine不懂教女。

指囡囡極需要愛

Elaine昨日接受本報訪問，問到有否察覺卓林自小的性取向？她說：「佢係我一路湊大，以前佢係有同男仔拍過拖。（意外？）又唔算，近呢一年佢成日同呢個人（Andi）玩，出雙入對，我都意識到。（得一個女，會唔會擔心？）唔緊要，無論佢變成點，外形唔緊要，最緊要安全同身體健康，作為父母就好感恩。（你兩個有冇就呢件事傾過？）冇，唔需要啦！佢安全就得，支持同尊重佢。」

會否覺得是因為關心不夠？她說：「呢啲嘢唔關單親家庭事，係性格問題，我自己都係單親家庭長大，幾歲就好獨立，自己照顧自己，但卓林好需要愛，要人陪，前幾年我返TVB拍劇，半夜返唔到屋企，佢係唔敢自己去廁所，而呢個人出現，24小時喺度講我愛你，佢自然好接受。」

每周900蚊零用

對於卓林與Andi沒有固定工作和收入，經常頻撲搬家，Elaine表示每個星期給予卓林900元零用錢，夠她用膳及交通：「屋企大門係隨時為佢開。至於佢冇錢交租，都要為自己負責，好似佢最近有返Office工，幫人執相。」要跟女兒分開住，Elaine心情當然鬱悶，但仍要逼自己習慣，平時會畫畫減壓，最近亦靠頌缽抒發情緒：「早晚都做，敲個盆之後發出嘅聲音同共震，會化解身體內嘅不快感覺，心情會開朗番啲。」

此外，公關鄭紹康表示由細睇到卓林大，昨晚專誠約她食飯，慰問一番，他說：「佢心情冇受影響，好開朗，餐飯食咗幾個鐘，大家有講有笑，好開心。」據知，卓林同性密友Andi亦在場。

文：影視組