陳美詩最愛孫耀威強勁臂彎
榮升「孫太」的陳美詩（Macy）與孫耀威（Eric）交往多年，她最欣賞Eric講信用兼是「行動派」，更自爆常被他的暖男舉動冧爆！雖然Eric對所有朋友都很細心，Macy依然對他信心十足，從不擔心會被搶走！
藝人陳美詩多年來默默做孫耀威背後的女人，一起經歷不少高低起跌，今年兩人修成正果結為夫婦，得到不少人的祝福！講到兩人的拍拖點滴，Macy透露與Eric在朋友階段已非常有默契，而她最被Eric打動之處，就是對方在生活瑣事上的窩心舉動：「有次我甩咗鞋帶，佢直接踎低幫我綁鞋帶，嗰時我哋啱啱一齊冇耐，我好Surprise！街上多人嘅時候，佢就自自然然會保護我、有樓梯就會翹實我，佢唔係講，係行動上用一個臂彎咁攬住我，會好冧！」
唔擔心老公被搶
Macy更大讚Eric凡事講得出做得到，亦很疼錫身邊的人：「佢事無大小都記得，就算好簡單話約食飯，佢真係會約，例如話幫人整電話，佢講完轉頭真係會做，睇日曆Mark期，佢真係好上心，呢啲嘢表現到佢好着緊身邊嘅人！」
Eric細心體貼，Macy卻不擔心他吸引到狂蜂浪蝶，對他有百分百的信心：「愛有好多種，朋友嘅愛同男女朋友嘅愛唔一樣，照顧朋友唔需要擔心嘅，反而開心，因為願意表達愛嘅人唔多！」
受影響想做就做
Macy承認受Eric這個「行動派」所影響，一改以往齋有Idea但不敢付諸行動的做法：「佢呢種行動型，畀咗勇氣同鼓勵我，教我去實行，依家有啲諗法，我都會識去實行。」一直未有放棄音樂夢的她，遂決定今年再戰樂壇，推出新歌《我會照顧你》：「呢幾年放慢咗腳步去充實自己，今年好想專注番工作，又有咁嘅機會，所以係個好時機畀大家了解我。」她希望未來可以推出更多作品，鋼琴了得的她更有意嘗試親自作曲及填詞：「我之前有寫專欄，詞就未寫過，嚟緊都有興趣試吓。」
文：音樂組
攝：司徒國榮
場地：MegaBox CEO
服裝：Ted Baker/Dearest Grace
髮型：Sunny Yu@Hair Culture
化妝：江中平@江中平化妝室