青雲被導演Juno逼到傻
【陳栢宇惠州直擊】劉青雲在新戲中不但槍戰連場，昨日更於活動中直言要在烈日下着大褸流汗扮凍，被導演麥浚龍（Juno）逼到傻傻吓！他指Juno的獨特思維異於常人，令他充滿驚喜，又笑對方意見接受，但態度照舊。
影星劉青雲、梁家輝、高圓圓等，昨日於惠州出席麥浚龍（Juno）執導的新戲記者會。在台上，提到眾演員要在炎夏着大褸拍落雪戲，青雲即笑言起初以為自己要到哈爾濱開工，怎料原來在惠州搭建出一比一的銅鑼灣街景拍攝，另又指Juno時有異於常人的想法，令他「傻掉」！訪問時，青雲解釋其實Juno令他充滿驚喜：「佢思維同其他人好唔同，有獨特o既要求同堅持。（嚴格？）佢係一個善良o既導演。（可以改對白？）佢都會接受你意見，但最後都係堅持自己o既睇法。」
被女神迷倒
而首次合作的梁家輝和高圓圓則表示，之前曾在一個拍賣會中碰面，當時家輝見圓圓着得少布，便除低西裝讓她披上身，雖然外套有淡淡煙味，但卻非常溫暖。
家輝又大讚圓圓是女神，自言被她迷住：「神級o既好難用文字形容，可能我才疏學淺，總之作為一個女仔，佢係神！」
製作費過億
至於Juno就解釋在惠州搭出銅鑼灣街景，是因為下雪的香港效果難以在實景中拍攝。問到製作費有多少？首次執導合拍片的他，只透露費用過億：「投資方唔畀我講。」又指最難、最花時間是組成演員團隊的過程：「用咗兩年時間，如果再半年後先拍，就唔會有呢個組合。」