DJ麻利亞疑電台失竊 發最後通牒

去年遭的士狂迷騷擾的電台DJ麻利亞（暱稱「麻利」），日前在私人社交網發文指電台有「小偷」：「其實我已經唔係第一次畀人偷嘢。」原來她將一個名牌護膚用品的禮盒放在辦公室座位，但內裏其中一款價值2,000多元的護膚品卻不翼而飛，她揚言要報警處理。

她指小偷拿走護膚品後，在禮盒重新綁上蝴蝶結，佯裝沒有打開過，令她忍不住爆粗：「你當我X嘅唔知裏面有乜？定見到我Post咗ig Story就等於安全？我畀時間你放低盒cream畀我，如果唔係我報警。」但據知她不打算把事件鬧大，亦低調地對事件不作任何回應。而電台對外事務部回應：「跟麻利溝通了，我們沒有補充。」至於其他DJ亦不欲多談，與麻利及鄭裕玲一同主持節目的余迪偉說：「唔知道。（麻利有冇同你講？）冇喎。」但凡記者所問，他都表示「唔知道」。

森美建議返歸摷清楚

對於麻利疑似閉門失竊，森美在電台工作逾20年，問到可曾遭遇類似事件？他說：「試過呀，以為畀人攞咗，其實自己放咗喺隔籬位，因為位同位之間都好近，自己懵懵哋擺錯呀，又或者自己攞咗返屋企唔記得。實際真係畀人偷嘢又冇喎，有時啲嘢食放咗喺度畀人食咗就有，普通Office會發生嘅事，都冇乜特別。我估佢（麻利）唔見咗，係咪攞咗返屋企唔知呀？試過啲客送月餅嚟，發覺我嗰籃冇月餅喎，莫非畀人偷咗？原來係個客放漏咗，我本人就擺烏龍多，希望麻利快啲搵番自己嘅物件啦！（贊成佢報警處理？）以我經驗同意見，都係返屋企摷清楚先，可能喺屋企呢！」

文：音樂組