曾國祥導出名堂娶硬王敏奕

嚴選劇本唔濫拍

無可否認《七月與安生》為Derek帶來不少機會，但成名之後反而令他更步步為營！他自言獲不少人邀任電影導演，一開口便有大量資金及酬勞，如果抵受不住誘惑而濫接，Derek怕賠掉名聲：「拍電影要好嚴謹，如果下一部好差，啲人會覺得我之前嗰部拍得好，只係好運或者有人幫，所以下一部要好小心咁揀，唔好因為自己有一部戲有少少成績，就覺得自己乜都拍得好。我覺得故事係最重要，最能打動人始終係故事。」

愛演配角輕鬆減壓

導演以外，Derek亦演出過不少電影，他認為做演員某程度能紓緩導演的工作壓力：「因為我演嘅多數係配角，比較輕鬆，好似工作上放假咁。導演就好大工作量同壓力，所以可以得閒客串吓係開心事，而且仲可以同唔同導演合作，從中偷師，所以我都會同導演朋友講我鍾意演出，有啱角色要搵我拍戲。」

曾國祥大讚王敏奕溫柔體貼，早已視她為結婚對象。	曾國祥視志偉為偶像，希望他朝成就能與父親睇齊。	雖然獲不少片商斟洽，但曾國祥嚴選劇本，絕不濫拍。

雖然《七》片令他在導演界闖出名堂，但亦未能為他脫下「曾志偉兒子」這個荊棘冠冕。Derek入行16年，再不是黃毛小子，他揚言早已跨過「靠父幹」這三個字的魔障，不會因別人一句靠父幹而動怒。他說：「咁又真係由爸爸介紹我畀陳可辛認識開始，雖然當時我只係入行做阿四，初時好唔鍾意人哋叫我『曾志偉個仔』，但知道呢個係事實。我用咗唔少時間去證明自己，如果依家仲係有人覺得我靠父幹，咁係偏見，我都冇辦法，我唔會介意。」他認為星二代可能贏在起跑線，但輸在要承受更多批判。他無奈地說：「有好多唔成功嘅星二代其實都好努力，只係機會未到，但唔可以否定佢哋嘅才華。呢行係鬥長命，唔到最後唔知邊個會成功！」Derek自言目標很簡單，只想每年拍一部電影，直到拍不動為止。

雖然在電影多演配角，但曾國祥（右）非常珍惜每個演出機會。	周冬雨（右）與馬思純憑曾國祥執導的《七月與安生》膺金馬獎「雙影后」。	曾國祥入行初期，很介意別人叫他「曾志偉個仔」。

曾志偉點解斷六親?

眾所周知，曾志偉是一位出色演員，每個角色均演繹到位。在Derek眼中，曾志偉是否將父親這個角色做得稱職？Derek坦承以前曾質疑對方是否一個好爸爸，因為他分給家人的時間實在太少：「我同爸爸嘅關係唔可以用疏離去形容，但佢真係好忙，以前同佢冇咁熟，我又喺外國讀書，但我入咗行之後，先明白到點解佢當年會咁忙，原來真係可以斷六親！佢其實好錫屋企人，只係佢用自己嘅方法去關心家人。」

Derek指父親對子女向來採取放任政策，不會干涉他揀學校、拍拖以至工作：「佢會由得我行自己嘅路，佢認為一個人要搵到自己鍾意嘅嘢，唔會將父母嘅價值觀放喺小朋友身上，佢咁嘅理念係好正確。」Derek十分欣賞爸爸經常無條件幫助人：「我由入行到依家，經常有人同我講你爸爸當年點樣幫我，冇佢就冇我之類，只要爸爸覺得值得就會幫，我好敬佩佢呢樣嘢。」

唔介意搵女友合作

至於Derek生命中重要的女人、拍拖三年半的女友王敏奕（Venus），Derek坦言未有結婚計劃，但已視對方為終身伴侶，希望可以與Venus長相廝守。Derek之前的戀情總是短暫，唯獨Venus例外，問到Venus哪方面最能打動他？他說：「大家好夾，好啱對方。最感動係佢對我嘅家人同朋友都好好、好照顧，佢係用個心去對人好。」Derek跟Venus一個導演一個演員，只要合適的話，他不介意合作，但不想為拍而拍。

文：陳嘉敏

攝：張福宏

服裝：G2000

化妝：Yannes Lee@NDNCO

髮型：Ken Hui@II Hair & Nail