G.E.M.對皮褲不離不棄
歌手鄧紫棋（G.E.M.）與19歲韓國小鮮肉金始炫前晚出席時裝騷，G.E.M.以運動型Bra Top露小蠻腰上陣，自稱最近愛上時裝，並開始找到自己的時裝風格：「清楚邊啲係唔適合自己，例如我好少着緊身短裙，因為我下腹好易脹氣，呢啲都係從以前經驗得番嚟，知道點去避免。」
不過，G.E.M.強調不會放棄其招牌皮褲Look：「我最近先搵到一條運動款皮褲。」對於衣着屢受劣評，她坦言每個女孩都想靚，惟有保持學習心態：「唔好太在意人哋眼光，唔好因為一次批評就覺得自己一世都唔會靚，有自信最緊要。（男友Mark Ngai有冇稱讚衣着品味好咗？）身邊好多朋友都有讚我。（有冇買衫畀男友？）你哋已經用呢個（男友）做代名詞？我會稱佢為Stylist，佢畀好多意見我。」又稱跟好友兼賭王三房千金何超蓮最近各自成立慈善機構，並於10月合作搞活動。
金始炫對鏡練習
G.E.M.又表示是第一次見金始炫，大讚他得意，問她是否沉迷韓星？她坦言：「我以前細個好鍾意睇《浪漫滿屋》，距離就是美，令人有好多幻想。（想唔想同韓星合作？）可以有多啲跨界合作，而且K-Pop係個潮流。」至於金始炫為時裝騷擔任模特兒，他表示是首度在海外行騷，感覺新鮮，事前有對鏡練習，又指喜歡成龍，希望有機會合作。