倪晨曦費事Set嫁期

宅男女神倪晨曦昨日出席護膚品活動，上月15日度過30歲生日的她，透露與孖生妹妹慶祝零舍開心：「好耐冇同妹妹一齊慶祝，原本Plan咗同佢去亞馬遜一間學校教小朋友學英文，但最後冇去到，媽咪同妹夫都擔心，唔畀我哋去。」又指妹妹25歲已結婚並育有兩個小朋友，雖被爬頭，但仍不心急，她說：「唔急結婚，媽媽湊兩個孫，唔得閒催我。（幾時結婚？）以前想30歲結婚，依家都30歲所以冇得Plan，一陣講咗幾多歲又嫁唔出。（同男友有共識？）感情好穩定。（閃婚？）應該唔會。」她又透露最近投資六位數開工作室，希望先專注事業。