克勤唱到扯蝦急徵氧氣筒
李克勤第六場紅館演唱會，邀得羽毛球「波友」葉蒨文擔任嘉賓，性感上陣的她爆料指老公林子祥忙洗衫而缺席。當克勤唱林子祥的「急口令歌」時，竟然「扯蝦」要搵氧氣筒回氣！
李克勤前晚假紅館舉行第六場《李克勤慶祝成立三十周年演唱會》，他介紹神秘嘉賓出場前大讚：「佢係咁多晚表演嘉賓中最認真嘅人，前兩日已經嚟綵排，好明顯係我嘅前輩，事關依家啲後生仔女唔會咁做。」又指這位世外高人去年曾在內地歌唱節目《我是歌手》中幫過他，並多次奪得「最受歡迎女歌星」獎，在如雷掌聲下，55歲的葉蒨文（沙麗）透視現身，跟克勤勁歌熱舞合唱《信自己》，但因跳得太勁，被克勤指瘦了的沙麗，豪氣地當眾抽裙頭，High爆的克勤又向沙麗單膝跪地。
李嘉欣甄子丹捧場
克勤問沙麗其「鬍鬚佬」老公林子祥（阿Lam）在何處？沙麗笑說：「我今朝打電話畀老公，佢喺美國洗緊衫，好鍾意做家務，到你60周年演唱會，佢就會返嚟。」又指阿Lam不在場也可照唱老公的歌，之後合唱阿Lam的《數字人生》：「30624700…」由於歌詞又多又密，49歲的克勤竟唱到喘氣，沙麗笑說：「唔怪得老公唔嚟，你冇事嗎？」克勤笑問：「有冇氧氣筒？」沙麗又指克勤慶祝完入行30周年後可繼續唱，克勤認同說：「汪明荃50周年都冇事，我點會有！」沙麗提議請汪明荃上台不果，其後與克勤清唱幾句汪明荃的《萬水千山總是情》，再獨唱《祝福》送給觀眾。
此外，當晚捧場嘉賓包括李嘉欣偕家姐及老公、甄子丹夫婦與兒子、蔡一智、梁漢文以及再度現身的「Fans」徐濠縈等，克勤太太盧淑儀更帶兩位囝囝在台前打氣。
文：音樂組