林明禎受訓唔襟打腳趾韌帶斷裂
馬來西亞演員林明禎來港拍攝新戲不慎傷腳，導致腳趾韌帶斷裂，目前要定期覆診及接受中醫治療，不過她仍大叫好玩。而拍檔何佩瑜（Jeana）則透露稍後會遭「撻生魚」，已有心理準備屆時可能會有瘀傷，認真搵命博！
林明禎、譚耀文、Jeana及梁琤等日前齊集尖沙咀一間辦公室，為黃永峰監製新戲《辣警霸王花2》開工。被網民熱捧的林明禎今次飾演女警，拳腳場面自然少不了，一向是運動高手的她甫開工已不慎受傷：「我是第一次拍打戲，原本以為有運動底子應該應付到，想不到受訓時已令腳趾韌帶斷了！現在有定期覆診及看中醫針灸，應該沒有大礙。」早前《辣》片於澳門拍外景期間遇上十號風球，令明禎相當難忘：「住在7樓的玻璃窗也吹裂，我是第一次遇上這種狀況。接下來我還會來港拍連續劇，希望努力練好廣東話。」
拳腳訓練焗汗護膚
首次擔演女主角的Jeana直言接劇本後既興奮又緊張，更不諱言將來首映定要父母、弟弟及男友翁子光到場助威。談到今次的拳腳訓練，Jeana說：「辛苦之餘我亦唔畀自己好過，專登去搵冇冷氣嘅地方鍛煉，覺得出嚟嘅效果事半功倍，流多啲汗精神咗、皮膚又好咗。（難忘場面？）相信係未拍嘅，因為嚟緊有場戲講我畀人追打，成間屋每個角落都要撻一次，首要係學識畀人撻，要將佢變成專業。」Jeana稍後更有機會夥拍郭富城及梁朝偉等，演出男友執導的新片，這是二人拍拖後首次合作，問會否擔心工作時產生摩擦？她滿有信心說：「應該唔會嘅。」
譚耀文為仔女搬竇
至於譚耀文則笑指今次「艷福無邊」﹕「圍繞我身邊嘅個個都係靚女，仲有楊恭如客串演我老婆喎，真係拍得好開心。」他又談到日後會多留港拍戲，並為了一對子女效法「孟母三遷」﹕「阿女考到屯門一間好學校，跟住阿仔又成功轉埋過去，所以我決定搬，方便佢哋返學。」
文﹕影視組