黎耀祥急操拍裸戲搣12磅走腩
年過50歲的黎耀祥日前與陳家樂拍攝新劇剝光豬戲，黎耀祥為這場戲勁減12磅，肚腩消失！而僅穿孖煙囪的家樂反而要增磅增肌肉，晒胸肌的他手瓜起(月展)，令人驚喜！
藝人黎耀祥與陳家樂日前於南生圍為無綫新劇《逆緣》拍攝外景，劇情講述「孫仔」黎耀祥在荒山野嶺被打劫之餘又被剝光豬，「阿爺」陳家樂前往營救，更脫去衫褲給對方穿，自己則只剩下孖煙囪！
想肌肉明顯啲
年過50的黎耀祥身形Keep得甚Fit，雖然沒有肌肉，但未見有肚腩，與赤裸上身的陳家樂合照時，更搞笑地縮肚挺胸扮大隻。而一向錫身的家樂平時鮮有拍除衫戲，今次晒肌又騷手瓜，甚有睇頭。
黎耀祥表示收到劇本時已知有一場「剝光豬」戲份，更要求監製於劇集開拍兩個月後才拍這一場：「我同家樂知有呢場戲時就已開始操Fit，我都減咗12磅。」一向少拍「裸露」戲的家樂平日有做Gym，但屬於鋼條型的他希望「增肥」，以顯得更大隻：「想睇落去啲肌肉明顯啲，操咗一段時間都有啲成績，不過最近忙住拍劇又瘦番。」他大讚黎耀祥厲害，因開拍前仍見對方有肚腩：「佢知道點減先可以跟到個拍攝進度，Keep得好好！」
文：影視組