胡定欣收巨鑽喊住答應「求婚」
視后胡定欣昨日正式踏入36歲，「胡說八道會」一班姊妹為她送驚喜，胡蓓蔚拎出巨鑽當眾「求婚」，並講出愛的宣言望做一世「靈魂伴侶」。而晚上大班好友在酒店為「Dry爆」壽星女慶生，袁偉豪更笑稱送自己作禮物。
藝人胡杏兒、胡定欣、姚子羚、黃智雯、李施嬅和胡蓓蔚六位「胡說八道會」好姊妹，昨日齊集中環出席無綫節目《胡說八道真情假期》記者會，當中以壽星女胡定欣最性感，身穿零打底西裝外套豪晒東西半球。胡蓓蔚為胡定欣送上驚喜，拿出巨鑽向踏入36歲的她「求婚」，更講出愛的宣言：「你願唔願意嫁畀我哋呢班好姊妹做一世靈魂Partner？」搞到胡定欣爆喊勁抹眼淚：「好願意！」而其他姊妹亦齊聲講願意，場面非常感人。
太多真命天子
胡蓓蔚為她戴上鑽戒後，胡定欣既興奮又激動，邊忍眼淚邊說：「你哋畀我嘅嘢實在太多，我哋六個相信就算有冇呢隻戒指都好，我哋嘅感情都係會一輩子到老。」更指這次澳洲之旅令她們感情昇華，眾人回港後亦不時翻睇照片回味美好時光：「我哋比以前分享更多，依家唔係朋友、姊妹咁簡單，係一家人，希望投胎到下一世，係唔係做人都好，都可以喺埋一齊。」
訪問時，胡蓓蔚解釋「婚禮」因由，指每年都會送生日禮物代表大家的友誼，但今年特別想為六人搞個儀式，以及預演胡定欣結婚。問是否代表其真命天子已出現？胡杏兒笑說：「好多喎，係睇吓認唔認真(口者)！」胡定欣即說：「唔認真嗰啲拜拜晒喇！」問戒指值幾多錢？胡蓓蔚說：「佢覺得係咩就係咩！」開心到爆的胡定欣說：「我冇懷疑過唔係真！」胡蓓蔚更指事前不敢向其他姊妹透露，以免穿煲：「隻戒指係無價嘅！」
約猛男開懷舊P
至於如何慶生，胡定欣說：「咪又係一齊過！朋友對我嚟講好重要，不嬲我哋做咩都一齊，係生活嘅一部分！Baby Lee（杏兒的BB）出世，杏兒唔得閒湊都係我哋湊，我帶佢入電視城做功課！」胡杏兒開心回應：「呢個契媽好忙！」
晚上，大班好友在酒店舉行六十年代懷舊主題派對，為壽星女慶生，胡定欣完成記者會後，先到附近髮型屋整頭扮靚再換紫色晚裝，約七時許到達酒店；雖然未有真命天子現身，「Dry爆」的她獲三名猛男袁偉豪、陳山聰和單立文到賀，問到送甚麼禮物？袁偉豪笑說：「我咪帶咗自己嚟囉！（點慶祝？）都係食飯啦！」而胡杏兒和胡蓓蔚則帶兩袋禮物到賀，未有受訪。其後剛收工的林夏薇與梁烈唯先後到場，林夏薇稱送香薰梘做禮物。
文：影視組
攝：追蹤組