卓韻芝「暴烈女神」踩慣屎
網絡發達令大眾多個平台去「不平則鳴」，38歲「暴烈女神」卓韻芝，性格敢做敢言強過男人，早排阿芝就喺網上發炮，鬧出「怪味湯底羅生門事件」，阿芝出名孝順外婆，外婆年事已高，若果真係食咗有問題食物，輕則小瀉，大則腸胃炎，食肆老闆堅持湯底「冇加料」，講咗句「係咪婆婆味覺問題」，緊張外婆嘅阿芝當堂觸動神經，在網絡上發文兼Post相「點相」，呢招借網民之力「公審」，有網民替老闆不值，斥阿芝係公眾人物「點相發文」等同網絡欺凌，亦有網民撐阿芝幫外婆出頭孝順抵錫，姑勿論誰是誰非，阿芝此舉已達到目的將怒火發洩，點都快過打去食環署等處理！
想自殺 連個天都唔收
所謂「暴烈女神」非一日煉成，阿芝14歲未夠秤就入咗電台做兼職DJ，人細鬼大轉數快，深得當時電台話事人器重，成為電台界天之驕女，多年嚟撈埋寫作、編劇、導演、演員，「功績」都咪話唔巴閉。不過，才女都有做「傻女」時，阿芝曾經因過於思念亡母而自殺尋死，好彩「時辰未到」，個天都唔肯收佢，執番條命嘅阿芝，當然心痛差啲令至愛嘅外婆兩度白頭人送黑頭人，阿芝能補償就係要更孝順，牽手帶着外婆周遊列國旅行享受人生，其實老人家就似一本歷史書，俗語都話「活咗大半世，食鹽多過你食米」，外婆嘅樂觀及開明思維，對阿芝是良方妙藥，再加「詞神」林夕出手，寫咗首《黑擇明》嚟勸勉阿芝，聽埋陳奕迅唱住：「死也未怕又怕甚麼苦戲，不如重溫好戲，死亡遲早都找你，切勿憑自己。」傻女終於變番才女，阿芝嘅名句就係：「做人是一定要捱一些屎，但屎，一定會過。別只看着屎哦。世界好大，值得笑的事，比起值得流淚的事多。」
坦蕩蕩 搵「SP」慰寂寞
其實阿芝的私生活都好引人入勝，面對愛情從來坦蕩赤裸，為愛豁出去就係佢本性，有段時期阿芝無愛可戀下，承認有過「Sex Partner」，慰解中女寂寞之苦，呢種何止係才女，直情係男士眼中「性女」！不過，去年阿芝叫Nuts哥暫時死心，佢已經「中途轉基」，公開宣布「出櫃」，阿芝外婆比佢思想更開通，仲好風趣問阿芝「冇柄喎，唔驚咩？」呢對非常婆孫真係夠潮爆。
回顧未出櫃前阿芝拍拖涉獵甚廣，金融才俊、音樂人同老外男模，尤其同Rock友Mr.成員MJ最Wild，被拍到買避孕套回香閨「爆房」，阿芝仲講過，第一眼見到MJ已經想「舔」佢眼球，極重口味！後尾與法籍男模拍拖流出「豎中指床照」，事後阿芝仲承認一手策劃，為新書造勢，呢招就叫非常時期用非常手段。阿芝「秀色可餐」亦係佢惹火源頭，不時騷胸晒腿，性感固然吸睛，但騎呢濃妝艷抹，圓點眉、黑眼蓋、青口紅，被網民嘲笑「醜人多八怪」，阿芝一個絕地反擊出「胸器」，事業線仲要P長幾吋，網民難敵呢條「蠱惑的線」，紛紛投上過千個Like，所以，要同才女玩，真係要諗清楚究竟邊個玩緊邊個！
Nuts哥