荷里活男神湯告魯斯（Tom Cruise）早前拍攝新片《職業特工隊 6》（Mission： Impossible 6）的「跳樓」鏡頭時受腳傷，停工3個月休養。靚佬湯受傷前接受訪問，宣傳另一新作《巴利薛爾：飛常任務》（American Made），出名冇架子的他自爆，拍攝期間棄住酒店，與男導演及男編劇同住一屋！
《巴》片是靚佬湯繼科幻片《異空戰士》（Edge of Tomorrow）後，再與著名導演德李文（Doug Liman）合作，在片中演飛行技術超卓的機師巴利薛爾（Barry Seal），表面上是民航機師，暗地裏卻揸飛機走私違禁品。原來角色巴利是真有其人，當年其案件曾轟動一時！
靚佬湯形容巴利是「反英雄」人物，雖然他為錢而做走私生意，但據靚佬湯所講，現實生活中的他亦有「善良一面」！他們從巴利妻子口中得知，巴利試過駕駛直升機接載哥倫比亞小鎮Mena的貧窮兒童去買雪糕食，靚佬湯說：「佢齊集所有小朋友，之後就『帶』佢哋去買雪糕。佢係啲拎咗錢就任意使晒嘅人，會派錢畀其他人。佢會搵機會，而機會亦會搵上佢。」雖然巴利「盜亦有道」，但靚佬湯表示唔會包容巴利所犯的事：「巴利喺冇界限之下而活，佢所做嘅嘢唔會喺現今社會發生，但嗰陣時，你可以甩到身。」
由於故事發生在哥倫比亞，電影亦於當地實地拍攝。一向專業的靚佬湯雖然貴為荷里活一級巨星，但為求拍攝認真，不惜與導演在當地的森林紮營露宿！影片同時亦在美國阿特蘭大取景，靚佬湯更自爆拍攝期間與導演及編劇做「室友」，他說：「喺阿特蘭大拍攝期間，我哋搵咗間大屋，於是就提議不如一齊住，有我、導演及編劇Gary Spinelli。由於冇人為我哋打掃，我哋就整咗個更表輪流負責。」而靚佬湯更大爆導演非常邋遢，相比之下他比導演有條理得多，繼而又踢爆編劇時常搵藉口唔洗碗碟，最後他為對方起了個「Gary公主」的花名。
除了對工作人員毫無架子外，靚佬湯亦一向善待fans，每次首映都例必在紅地氈上有求必應，為fans簽名合照超晒時，他解釋：「我去首映係想慶祝一部電影嘅誕生，自己本身亦係影迷，所以好鍾意呢種接洽，會增添工作樂趣，同時令我有機會着靚啲、打扮吓。」靚佬湯自言孩童時已看電影，四歲那年更視拍電影為夢想：「我好想去遊覽呢個世界，唔止做旅客咁簡單，想去學習。我愛歷史，想成為文化嘅一部分，電影令我感受到不同嘅人生及文化，亦超越所有語言障礙。我實在好愛電影，係人生中最愛！」
對於近年有不少荷里活巨星嘗試演舞台劇，問到入行36年的靚佬湯又會否試吓「踏台板」？他說：「我想演音樂劇！唔單止百老匯，仲想跳吓舞，不過睇情況啦！我鍾意考驗自己，睇吓做唔做得到，睇吓會唔會跌落地同埋跌得有幾勁，會盡自己能力去做，應該會好過癮。」
文：外娛組