鄭麗莎練成「十環踢」誓做拳后
曾參演六部電影包括《家有囍事2009》及《刑警兄弟》的「體壇蜘蛛女」鄭麗莎（Lisa）除熱愛幕前演出，亦喜愛運動，過去10年由攀石比賽、到搶包山及健美賽事都贏得冠軍殊榮，連婚後生B亦同樣厲害，三年抱四！Lisa今年復出競技舞台，但並非搶包山，而是首次踩上泰拳擂台，出戰9月11日於九展舉行的「YOKKAO 25 & 26」，以「拳后之路」為目標。
硬食連環拳
距離出賽一個月前，Lisa已勤於操拳及練體能，拳打沙包不在話下，更被教練以「連環拳」喪打小腹，但仍面不改容，之後Lisa再來一腳「十環踢」，乾淨俐落！Lisa直言一向喜歡挑戰自己：「都做咗十幾年運動員，直至結婚生仔之後先放低咗，呢六年間都冇參加過比賽，而生完（四個小朋友）似完成咗屋企嘅使命，唔使再生B住，目標就變咗積極收身。」
收身變比賽
打拳收身竟變成上擂台，Lisa表示：「當時朋友叫我試吓打館外賽，試咗一場後，覺得好好玩，成績都唔錯，鍾意打拳嘅過程，後尾有人問我有冇興趣打大型賽事，我覺得又幾好喎，算係一個目標接一個目標。」Lisa現時每周五、六、日進行泰拳訓練，早上則做健身運動。問到可會和神級選手對戰？她坦言：「唔會啦，水平仲差好遠，都係搵番啲差唔多嘅對手對戰。我知道好多外國嘅打拳大師嚟出賽，有幸可以欣賞到佢哋嘅風采。」
囝囝被嚇怕
Lisa透露老公亦相當支持她打拳：「老公都有玩打拳，大家有共同話題，不過佢成日叫我唔好咁多目標，要放鬆自己，都擔心我辛苦，做媽咪角色都要有番屋企責任，所以希望每樣嘢都做得好。（有冇同老公對戰過？）都有玩吓，咁男同女嘅力都唔同，佢嘅拳點都大力啲。」又稱大仔第一次看她練習時，嚇到攬住她雙腳以為媽媽被人打，現在才明白是運動，還會說：「Kick！Kick！Kick！」
Profile
暱稱：蜘蛛女
年齡：31歲
攀石、搶包山、健美獎項（部分獎項）：2011年及2012年長洲太平清醮搶包山比賽女子組冠軍、2010年世界健體小姐冠軍、2006年亞洲運動攀登錦標賽亞洲速度賽攀登金牌
文：音樂組
攝：吳文聰
場地：Fight Factory Gym