陳曼娜升呢做外婆孫女兩車揸手
藝人陳曼娜女兒鄭祖兒（Joie）去年11月下嫁上市公司董事Dicky，婚宴當晚Dicky笑言希望三年抱兩，二人果然火速造人成功，Joie日前（8月26日）在養和醫院誕下6磅多重的B女Kaelyn，恭喜！恭喜！
初次榮升外婆的陳曼娜心情非常興奮，接受本報訪問時，大讚B女可愛又醒目：「BB女出世兩日之後，已經識對住我哋笑，笑得勁甜，所以Joie改咗BB嘅乳名叫做『棉花糖』，話佢又甜又軟綿綿。（Joie生嘅過程辛唔辛苦？）Joie係用無痛分娩，係順產，我同Dicky都一齊睇住BB女出世，Joie依家好食得，BB飲人奶一樣好食得。」
廿幾萬套房待產
提到女婿，陳曼娜表示Dicky好細心，一早為Joie生產做好準備：「Dicky好緊張，一早訂定醫院入面設備最好嘅待產房畀Joie，房入面有飯廳、客廳同主人房，好似話使咗廿幾萬。（你送咗咩禮物畀孫女？）我就買咗兩架BB車，適合唔同場合用。（要成萬蚊一架？）差唔多啦，BB用唔會計啦！」至於會否擺滿月酒，她表示要再和女婿商量，可能只舉行百日宴。
文：專案組